With talk say coalition dey brew before 2027 election, former Labour Party (LP) presidential campaign spokesperson, Kenneth Okonkwo, don talk say im go support fresh southerner or northerner wey go gree comot for office after only four years.
E say im decision dey based on equity and fairness for both northern and southern regions of di country, as e take follow di unwritten rule of rotational presidency.
“Make everybody come together. Na something we fit discuss. Who go do only four years go determine who I go support because I still believe in equity and justice,” Okonkwo talk for di Sunday edition of Inside Sources with Laolu Akande, wey be socio-political programme.
Di lawyer wey comot for Labour Party for February 2025 talk say im dey open to join di coalition wey dey form to remove President Bola Tinubu of di All Progressives Congress (APC) for di next election.
Talk about coalition don dey gain ground recently, especially after former Kaduna governor, Nasir El-Rufai, waka comot from APC enter Social Democratic Party (SDP).
El-Rufai don dey show for pictures with di 2023 presidential candidate of People’s Democratic Party (PDP), Atiku Abubakar, plus other big politicians for opposition. Just like El-Rufai, Okonkwo don also meet with Atiku, talk say Nigeria need cooperation to fit defeat di ruling APC for di next election.
Okonkwo describe di APC government as incompetent, talk say opposition must stand strong together if dem wan collect power from di people wey dey rule now.
Im talk say, “My plan dey simple. If opposition serious about how dem go take collect power from dis incompetent government, dem must come together and act like one, because na wetin APC do for 2013 wey help dem collect power for 2015.
“I believe for coalition. When I comot, I talk say I dey open to discuss with any group wey wan join hand to make opposition strong, so we fit remove dis government.”
Di lawyer describe di 2027 election as complicated and complex but talk say di coalition fit discuss how dem go take win di election.
Okonkwo talk say, “2027 na one of di most complicated and complex political times for Nigeria history because we get one kind gentleman agreement – eight years for South, eight years for North.
“But when di person wey dey power no dey do well, and e still get some years remain, e go dey hard to change am or predict wetin go happen.
“You go talk say make dem bring fresh person from di South? Di North go talk say dat one mean say e go do another eight years. Dem go fear, because politicians no too sabi trust people.
“You go allow incompetent government continue just because you wan sacrifice di whole Nigeria? Just because you wan make dem complete eight years?
“You go talk say make e go North when di South never even complete dia own eight years? Di South go talk say dem don cheat dem. So na serious matter.
“Di best thing, if politicians fit trust demsef, na to do free and fair primary wey go allow everybody wey qualify – whether South or North – to contest. Anybody wey win go gree do only four years, whether na from South or North.
“If na northerner do four years, e go balance di thing between North and South – four years each – before e return back to di South.
“If na fresh Southern person win, e go do only four years to complete di eight years. After dat, e go go back North wey e go spend another eight years.
“So if di North gree say di person wey dey dia now no dey do well but e never reach dia turn, dem fit agree do four years – but di person go need win free and fair election. Because if dem come talk say dem no go do primary, na select dem go dey select person, e no go be democracy.”
