A bill wey go stop di gap and discrimination between Bachelor’s Degree holders and Higher National Diploma (HND) holders don pass second reading for House of Representatives.
Speaker Tajudeen Abbas talk say di bill wan change HND to Bachelor of Technology so polytechnic graduates go fit compete well with university graduates.
Di bill, wey Honourable Fuad Laguda from Lagos State sponsor, still emphasize di importance of technical education.
Speaker Abbas talk say all polytechnic boards for Nigeria don agree say “make dem abolish HND and replace am with Bachelor of Technology so polytechnic graduates fit compete with university graduates.”
E still talk say dem dey propose hybrid supervision, where NUC (National Universities Commission) go handle di degree part of polytechnic education, while NBTE (National Board for Technical Education) go still dey in charge of National Diploma.
Because polytechnic go dey award degrees under dis new plan, dem suggest say di qualification for rector position go be minimum of Ph.D, since di school go dey run degree programs.
After Abbas put di bill for voice vote, di lawmakers approve am make e pass second reading.
