The Supreme Court don cancel di judgements wey Court of Appeal and Federal High Court give, wey sack Senator Samuel Anyanwu as PDP National Secretary.
A five-man panel for di apex court rule say di matter of who be PDP National Secretary na internal party issue, and e no be something wey court suppose judge.
Justice Jamilu Tukur, wey deliver di main judgment, strike out di trial court decision wey dem give for October 2024 and also cancel di majority judgment of di Court of Appeal wey confirm Anyanwu sack for December.
Instead, di Supreme Court support di minority judgment wey Justice Ekanem give, wey talk say di trial court no get jurisdiction to rule on di matter.
Di court still talk say di person wey carry di case go court, Aniagu Emmanuel, no get legal right to do am because e no fit prove say di matter affect am directly.
