US President Donald Trump don sign new order wey go tighten control on federal elections, including di requirement say people must show proof of citizenship before dem fit register to vote.
Di Republican leader, wey still dey attack di election system, insist say e still dey against am.
Experts don quickly condemn di executive order, call am abuse of presidential power, say e fit stop millions of Americans from voting. Rights groups don already talk say dem go carry di mata go court.
Trump, wey dey serve im second term, never still gree say Joe Biden beat am for di 2020 election. E still dey claim say massive election fraud happen, especially for absentee voting, wey don become common for US elections.
“Maybe some people go say make I no complain because we win landslide last November,” Trump talk as e sign di order for White House.
“But we must arrange our election system. Dis country don sick because of fake elections, and we go fix am one way or di other.”
Di new law go make am compulsory for people to show proof of citizenship—like passport—before dem fit register to vote for their state. Any US state wey no comply fit lose federal election funding.
Di order still give di Attorney General power to “take all necessary action” against states wey count absentee or mail-in ballots wey dem receive after Election Day.
Some states dey allow absentee ballots wey post before election close, even if dem arrive later.
Law professor Richard Hasen from di University of California, Los Angeles, call di order “dangerous”, say e fit “disenfranchise millions of voters.”
For him Election Law blog, Hasen talk say Trump dey do “executive power grab”, since na di states and Congress suppose dey in charge of federal elections.
Di Brennan Center, a nonprofit public policy institute, talk say di order “go block tens of millions of American citizens from voting. Presidents no get di power to do dis.”
Di ACLU, a strong civil rights group, call di order “extreme abuse of power” and promise to fight am for court. “We go see am for court,” dem tok.
For di US, e don dey illegal for non-citizens to vote for federal elections for decades, and di law talk say anybody wey break am fit face fine, imprisonment, or even deportation.
