Arsenal don lose for UEFA Champions League semi-final as Paris Saint-Germain (PSG) beat dem 2-1 for second leg.
Dis loss mean say Arsenal go end di season without any trophy again – na five straight seasons now wey dem never win any major title.
PSG wey win overall, go enter their second ever Champions League final – dem first reach final for 2020 but Bayern Munich beat dem 1-0.
Arsenal already dey one goal down from first leg for Emirates Stadium. For second leg, dem try come back and even start di match well.
PSG keeper Gianluigi Donnarumma deny Gabriel Martinelli and Martin Odegaard with some sharp saves early on.
Khvicha Kvaratskhelia nearly score for PSG as im shot nack di post for 17th minute. But na Fabian Ruiz finally break di deadlock 11 minutes later – totally against how di game dey go that time.
That goal mean Arsenal need two goals to even balance things for aggregate.
Bukayo Saka nearly equalize midway second half with one wicked curling shot, but Donnarumma stop am again.
Then wahala come when VAR show say Arsenal player Myles Lewis-Skelly hand touch ball inside box – dem blow penalty.
But Vitinha wey play di penalty use one kind weak run-up, and Arsenal keeper David Raya save am.
Hope still dey for Arsenal, but e short-lived. For 73rd minute, Thomas Partey fail to clear ball well and Achraf Hakimi score better goal for PSG.
PSG fans begin celebrate as dem believe say di game don end. But just three minutes later, Bukayo Saka score from Leandro Trossard cross to give Arsenal small hope.
Saka still get one big chance for 80th minute to make am 2-2, but he miss am badly as he play ball go over bar from close range.
Now, PSG go face Inter Milan for final wey go happen for Allianz Arena – Bayern Munich home ground.
