Governor Hyacinth Alia don confirm say 59 people don die for Yelewata after suspected herdsmen from Nasarawa State attack the border town.
As im dey talk with journalists for Government House on Sunday, Governor Alia talk say na security people join body with families of the victims take do physical counting wey show say 59 people die.
Among the people wey die, na some military and civil defence officers wey fight to protect Yelewata from the attackers.
Alia also hail im Nasarawa State counterpart, Governor Abdullahi Sule, say the man share correct intelligence about the killings, and even for Nasarawa side, one woman still die from the same attack.
Governor Alia drop all these gist when im receive report from panel of inquiry wey dey investigate militia wahala for Sankera axis. He promise say the people wey dem mention for the report go face proper investigation, make peace return to Sankera.
Meanwhile, Pope Leo XIV don condemn the killings for Benue, call am one kind “terrible massacre” wey dem kill mostly displaced civilians with “serious wickedness.”
For Vatican on Sunday before Angelus prayer, the Pope express serious concern about the violence wey dey happen for Nigeria and beg God for “security, justice and peace.” He specially pray for the Christian villages for Benue wey don suffer from constant attacks.
The attack for Yelwata happen late Friday night, when the suspected herdsmen invade the town wey dey the border between Benue and Nasarawa States.
On Sunday morning, angry youths storm Wurukum Food Basket Roundabout for Makurdi to protest the killings. Dem begin gather as early as 8am to demand action. Social media influencer, Martin Otse aka VeryDarkMan, later join them.
Presidential spokesman Bayo Onanuga come release statement say President Bola Tinubu don order security chiefs to make sure peace and security return to Benue.
He say, based on the president’s instruction, intelligence officials, police and military don land for the state to take full control of security operations and bring back normal life.
