De Lagos State Government 2025 Budget of N3.005 trillion don pass second reading for de House of Assembly.
After that one, de House come refer de budget to de Appropriation and Finance Committees for review and to report back by one month.
De State Assembly siddon and consider de budget under de leadership of de Speaker MUDASHIRU OBASA, after presentation by Chairman of de Committee on Budget and Economic Planning, SA’AD OLUMOH.
De lawmaker come show worry about de size of de budget deficit of four hundred and eight billion naira, and come advise say e no good make government borrow money anyhow.
Other lawmakers, wey include Hon GBOLAHAN YISHAWU, and Hon DESMOND ELLIOT, also chook mouth for the budget mata, dey complain say them no see provisions for electricity infrastructure, and food security funding, among others.
For him own tok, de Deputy Majority Leader, Hon Adedamola Richard Kasumu say e better make them careful review de budget and do comparative analysis and feasibility before them go pass am.
Also, Hon. Femi Saheed, tok say e dey very important to use borrowed money for correct infrastructure projects, like electricity, and to make sure say them achieve revenue efficiency by say them block all areas wey money dey wastes.
You go remember say Governor Sanwo-Olu been tell de lawmakers for the budget presentation say 59% na for capital expenditure, while 41% na for recurrent expenditure. Him still tok say government go borrow external and internal loans and bonds to support de budget deficit.
Details of the Lagos State House of Assembly sitting ontop de budget contain for inside press release by the Chief Press Secretary to de Speaker, Eromosele Ebhomele.
