One big leader for Afenifere, di pan-Yoruba socio-cultural group, Pa Ayo Adebanjo, don kpai at di age of 96.
Di elder statesman waka go meet Baba God peacefully for him house wey dey Lekki, Lagos State, on Friday morning, February 14, 2025. Him family confirm di tori inside official statement wey dem release to di media on Friday.
“Na dis morning, Friday, February 14, 2025, him take waka go meet Baba God for him Lekki house for Lagos at di age of 96,” di statement talk.
Pa Adebanjo be correct lawyer, former Organizing Secretary for di Action Group, and di National Leader of Afenifere. E leave behind him 94-year-old wife, Chief Christy Ayo-Adebanjo, him pikin dem, grandchildren, and great-grandchildren.
“We go always remember as e stand gidigba for truth, fairness, and justice. E no ever shake for di struggle to make Nigeria beta, and na wetin e fight for till di last breath wey e breathe,” di family statement add.
Mrs. Ayotunde Atteh (née Ayo-Adebanjo), Mrs. Adeola Azeez (née Ayo-Adebanjo), and Mr. Obafemi Ayo-Adebanjo sign di statement on behalf of di family.
