Senate President Godswill Akpabio go lead Nigeria delegation go Vatican City for Pope Francis burial wey go happen on Saturday.
For one statement wey presidential adviser on Information and Strategy, Bayo Onanuga, drop on Friday, e talk say na President Bola Tinubu arrange the five-man delegation.
Other people wey dey the delegation include Minister of State for Foreign Affairs, Ambassador Bianca Odumegwu Ojukwu; Archbishop Lucius Iwejuru Ugorji wey be President of Catholic Bishops Conference of Nigeria; Archbishop of Sokoto Diocese, Matthew Hassan Kukah; and Archbishop of Abuja Diocese, Ignatius Ayua Kaigama.
Pope Francis, wey be the respected head of the Roman Catholic Church, die on Monday, April 21, 2025, at the age of 88 — just one day after e show face for Easter Sunday celebration for Vatican.
Onanuga talk say the delegation go carry official letter from President Tinubu give the Acting Head of the Vatican to express Nigeria sympathy and condolence over the death of Pope Francis.
On Monday, President Tinubu follow Catholics and Christians all over the world mourn Pope Francis, wey e describe as “humble servant of God, tireless helper of the poor, and guiding light for millions.”
For the condolence message, President Tinubu talk say the Pope death, wey happen just after Easter celebration, na like holy return to him Creator at the time of renewed hope for all Christians.
