Federal High Court for Abuja don stop di Senate Committee on Ethics, Privileges, and Public Petitions from doing disciplinary hearing against di Senator wey dey represent Kogi Central, Natasha Akpoti-Uduaghan.
Di presiding judge, Obiora Egwuatu, give di order on Tuesday after Akpoti-Uduaghan lawyer file ex parte application.
On February 20, di Kogi Central lawmaker get clash with Senate President, Godswill Akpabio, on top seat allocation matter. She reject di seat wey dem give am, go against Akpabio order, and still dey raise point of order even after dem overrule am.
Senator Yemi Adaramodu, wey dey represent Ekiti South Senatorial District, raise point of order for plenary talk say di matter don spoil Senate image.
E talk say even though dem wan explain di Senate position, people don already get dia own opinion based on how di Kogi lawmaker take act.
Because of wetin happen, di Senate carry Akpoti-Uduaghan go Ethics Committee make dem review di matter.
Di upper chamber take di decision for plenary last Tuesday after dem consider and adopt di report wey Adaramodu present.
After Akpabio put di matter for voice vote, di Senators agree make di committee handle am. Di Senate President come instruct di committee make dem check di whole matter well and report back to di Red Chamber.
