Chief Magistrate Court, Wuse Zone 6, don summon blogger Martins Vincent Otse, wey people sabi as VeryDarkMan (VDM), for “criminal defamation” against gospel singer, Mercy Chinwo.
For di court summon wey dem date March 5, 2025, Chief Magistrate Emmanuel Iyanna don order VDM say make e show for court in person on March 13, 2025, to answer di charges wey Mercy Chinwo carry come against am.
Di criminal case come from wetin dem say na defamatory statements wey VDM make for social media, where e accuse Chinwo say she get hand for one contract wahala and say she divert $345,000 wey connect to her former record label boss, Ezekiel Onyedikachukwu (Eezee Tee).
To prove say di allegations no be true, Chinwo carry documentary evidence go court, including emails and payment receipts, to show say wetin VDM talk na false talk wey don damage her public image and reputation.
For di criminal complaint wey her lawyer, Pelumi Olajengbesi of Law Corridor, file, Chinwo talk say wetin VDM do dey against Sections 391 of di Penal Code and Section 24 (1)(B) of di Cybercrime (Prohibition, Prevention etc) Act 2015.
Magistrate Iyanna don give order say make VDM appear for court on March 13, 2025, to defend himself.
No be today di matter start, as Chinwo lawyers don already carry di case go High Court for Federal Capital Territory, Abuja, where dem dey find N1.1bn damages against di blogger. Di lawyer dey also demand make VDM delete, retract, and apologize publicly for all di things wey e talk against Chinwo and her brand.
For February 17, 2025, one Federal High Court for Lagos talk say di arrest warrant wey dem issue against Eezee Tee for alleged fraudulent conversion still dey valid, and di case go continue for March 6, 2025.
For di defamation suit, Olajengbesi talk say VDM make di posts without provocation, and e do am to spoil Chinwo name for public eye. Chinwo don submit all di documents and evidence wey show say everything wey VeryDarkMan talk na lie.
Di lawyer still talk say di VDM posts wey e make for Instagram on February 2, 3, 4, 5, 12, and 17, 2025, cause serious damage to Chinwo public image, reputation, and emotional well-being. Inside di posts, VDM accuse Chinwo say she dey collect shows and gigs behind di record label and she no dey remit di money.
