Delegates don gather for Eko Hotel and Suites wey dey Lagos State, Nigeria commercial capital, to celebrate ECOWAS @50 — one big event for di regional bloc wey dey promote unity and togetherness.
Before di celebration start, President Bola Tinubu wey be Chairman of ECOWAS Heads of State and Government don join other community leaders, plus di only surviving founding father of ECOWAS, General Yakubu Gowon, wey help form di group in 1975 with treaty wey dem sign for Lagos.
Dem dey re-enact dis important part of ECOWAS history for Nigeria Institute of International Affairs (NIIA) for Victoria Island, Lagos.
After dis part of di event, all di Heads of State, government people and ECOWAS officials go move go Eko Hotel go continue di celebration.
For statement wey Tinubu spokesman, Bayo Onanuga, release before di event, e talk say di President of ECOWAS Commission, Omar Touray, go give welcome speech.
“For di Eko Hotels and Suites event, President Tinubu wey be ECOWAS Chairman go talk about di achievements of di economic bloc. Di Chairman of NIIA and former Minister of External Affairs, Prof. Bolaji Akinyemi, go review how ECOWAS don waka for 50 years, and panellists for NIIA go later break everything down.”
“Di only Head of State wey still dey alive among di people wey sign di ECOWAS declaration, Gen. Yakubu Gowon (Retired), go join all di activities and still give speech for Eko Hotels,” di statement add.
