Former Kaduna State governor, Nasir El-Rufai, don raise alarm say some people dey plan to arrest and detain am.
El-Rufai talk say e don hear rumors about di plan, but e no get any intention to run comot go exile.
For one post wey e drop for X on Tuesday, di former governor talk say e enemies dey try use fear push am comot for Nigeria.
E yan dis one as e dey respond to one of e supporters, Imran Wakili, wey talk about di alleged plan to arrest am.
El-Rufai wey dey Egypt now, talk say e go return to Nigeria before February 20.
“I go even spend more time for Nigeria pass before,” El-Rufai talk.
“Dem don send different threats and intimidation message through my friends, family, and political people wey I sabi, because dem wan make I run comot go exile by myself.
“But I don cancel all my academic and language-learning plans for now. Silence no be golden again. To sit down look no be option.
“To arrest, detain, or even torture political enemies no be new thing for human life. Dem don arrest and detain me three times before just because I talk my mind against past governments.
“But no matter wetin happen, after arrest or detention, political life still dey continue. As for death, na only Allah sabi when e go happen, and na wetin go reach everybody last last.
“For those people wey no dey fit sleep well anytime wey I dey Nigeria, make una know say I go return before di launch of Pres IBB’s memoirs wey dem schedule for 20th February, in sha Allah.
“We no depend on anybody except Allah. We no fear anybody except Almighty Allah. We dey always hope for di best but we dey plan for di worst.”
El-Rufai and some supporters of President Bola Tinubu, plus members of di All-Progressives Congress (APC), don dey get political wahala.
Recently, e accuse APC say di party no get internal democracy, because di party leaders never hold meeting for di past two years.
