Edo State Governorship Election Petition Tribunal wey siddon for Abuja don dismiss di case wey Action Alliance (AA) file to cancel Governor Monday Okpebholo election.
Di three-man panel wey Justice Wilfred Kpochi dey lead talk say di petition no get merit. Dem say di matter na pre-election palava wey di tribunal no fit handle.
AA bin talk say INEC no include dia correct candidate for di election wey shele on September 21, 2024. Dem claim say INEC recognize person wey no be di original party candidate, and dis no follow di Electoral Act.
Apart from dat, AA still talk say Okpebholo no win di majority vote and say di election get plenty mago-mago. Dem kon beg tribunal make dem cancel di election, but di panel no gree.
INEC and Okpebholo bin argue say di AA National Chairman no get right to carry di case go tribunal since im no contest for di election. Dem still talk say di case don pass di time wey law allow tribunal to handle.
E go dey important to remember say di AA candidate, Tom Iseghhi-Okojie, withdraw for Okpebholo few days before di election.
