Popular Nigerian skitmaker, Oluwadolarz, don finally talk hin own side after hin ex-fiancée, Ifeluv, accuse am say e cheat and no dey responsible financially for dia relationship.
For one statement wey e post for Instagram story on March 18, 2025, before e later delete am, Oluwadolarz thank hin colleagues and supporters, con address di allegations wey dem put for hin head. E talk say di whole matter no happen di way e plan am, but e need to speak out, especially because of hin pikin.
“Di way e take happen no be wetin I plan, but e don already happen. I dey talk dis one because my pikin go grow one day, and as we all sabi, internet no dey forget,” Oluwadolarz write.
E also react to di allegation wey involve one female skitmaker, Lola, wey Ifeluv talk say she catch am with.
As e take talk:
“For dis recent allegation about Lola, e be like say na di opportunity wey she dey wait for. Lola don dey come my studio apartment since last year, she don even ask me many times make I help am invite people for her shoots. Now I dey wonder how dis same Lola con suddenly turn problem. How person wey dem see for guest restroom go con turn big issue?”
Oluwadolarz talk say di whole matter dey look like say na strategy to create story wey go make people pity Ifeluv and spoil hin name.
“E don clear say na to form one kind narrative and use ‘pity card’ take spoil my name. But if to stand my ground and defend myself go make some people call me manipulator or narcissist, no wahala,” e write.
E even talk say if to talk hin truth go make dem no allow am see hin pikin again, e ready accept di consequence.
Di gbas-gbos between Oluwadolarz and Ifeluv don cause plenty arguments for social media, as fans dey pick side. Ifeluv don first talk say Oluwadolarz dey cheat anyhow and no dey contribute financially, say na she dey carry most of di responsibility for di relationship.
But as Oluwadolarz don finally reply, plenty people for social media no too gree with am, as some dey criticize wetin e talk.
