Four seminarians don die and nine others injure for accident wey happen for Obudu Ranch Resort area for Cross River State.
Di accident happen for Ikwette community near di bottom of Obudu Ranch Resort hill, na wetin Nsa Gill, wey be Chief Press Secretary to Governor Bassey Otu talk for one statement.
According to am, “Di sad incident cause di death of four people and injury to nine others. Our hearts dey with di families and friends of di victims during this hard time.”
Preliminary report suggest say na brake failure cause di accident, and di vehicle wey crash carry thirteen people.
Gill talk say di victims na seminarians from Enugu Catholic Diocese wey come tour di Ranch with one Reverend Father.
Dem don finish dia tour when di accident happen as dem dey descend from di hill, outside di main area of di resort.
Cross River State Government don send condolences to di victims and promise say dem go make Obudu Ranch Resort and di entire state more safe.
Di government also talk say dem go review safety measures for di ranch and advise visitors to always check say dia vehicles good and follow all safety guidelines when dem dey enter or leave di resort.
Dem end di statement with, “Our heartfelt condolences go out to all those wey dis tragedy affect.”
