Suspended Rivers State Governor, Siminalayi Fubara, don talk say e no get anything to do with militants, as e dismiss some recent social media posts and videos wey dey try cause wahala for di state.
For statement wey im Chief Press Secretary, Nelson Chukwudi, drop, Fubara condemn di fake videos wey some people dey circulate, wey dem talk say na explosion for oil and gas facilities for Rivers State.
Di statement still talk say di communities wey dem mention for di fake videos don already clear di matter say nothing like dat happen, and all di important infrastructure dey intact.
“For di record, Governor Siminalayi Fubara no get any connection with militants, e no even dey think of such thing, and e no fit support any criminal wey go disturb peace, security, or di economy,” di statement tok.
Fubara come still stand gidigba say e dey committed to peace for Rivers State, because na only for better environment governance and development fit work.
E warn people wey wan use di political crisis take do their own agenda, and e advise bloggers and social media influencers make dem stop to dey spread fake news wey fit cause more wahala.
E still beg security agencies make dem investigate and catch people wey dey spread di false information wey fit disturb peace for di state.
