Di suspended governor of Rivers State, Siminalayi Fubara, bin visit President Bola Tinubu for Lagos on Tuesday.
Na presidential spokesperson Bayo Onanuga post photos of dem two during di meeting.
“Governor Sim Fubara of Rivers, wey dem don suspend from office, visit President Bola Tinubu for Lagos on Tuesday,” na so Onanuga write as caption for di pictures wey e post for him X handle Tuesday evening.
But di full gist of wetin dem talk for di meeting never come out.
Di visit happen months after Tinubu suspend Fubara, him deputy Ngozi Odu, plus members of di Rivers State House of Assembly because of di long political wahala wey dey shake di state.
Di whole gbege start because of power struggle between Fubara and him predecessor Nyesom Wike, wey be di current Minister of FCT.
Di matter later enter di House of Assembly, come divide di lawmakers into two camps — some dey support Wike, while others dey behind di troubled governor.
As di tension no gree calm down, Tinubu on March 18 suspend Fubara, Odu, and di House of Assembly lawmakers for six months. E also appoint retired naval officer, Ibok-Ette Ibas, as sole administrator of di state.
Tinubu talk say di suspension na to protect peace and security for Rivers State, especially after efforts to settle di matter no work and reports of pipeline explosions come out from di area.
E say, “With all dis kind things wey dey happen, no responsible President go just siddon look without taking serious steps wey Constitution allow to bring back better governance, peace, and security.”
Since dem suspend Fubara, e don dey talk say him wan peace for di oil-rich state and him still wan settle with Wike, wey e call him “oga.
