Nollywood actress, Hilda Dokubo, don para for President Bola Tinubu sake of say e suspend di Rivers State governor and declare state of emergency for di state.
On March 18, 2025, Dokubo carry her vex enter Instagram, talk say di move na deliberate plan to “capture di economic soul of Rivers State.”
As she express her anger, she write:
“State of emergency because for two years we don get peace! State of emergency because you wan capture di economic soul of Rivers State! State of emergency because of one man? Shameless! Maybe Mr. President suppose just talk say e wan collect Rivers State!”
Her reaction come after Tinubu, for national broadcast dat same evening, announce say e don suspend Governor Siminalayi Fubara, hin deputy, and all di members of di Rivers State House of Assembly for six months.
Tinubu talk say e dey use Section 305 of di 1999 Constitution take back up hin action, say na di only way to restore order and stop di crisis from getting worse.
“We no fit allow political wahala scatter di peace and governance for Rivers State,” Tinubu yan.
But many Nigerians no gree with di decision, especially people for Rivers State. Dem talk say di action no follow constitution at all.
See wetin people talk:
“Dis state of emergency na too much. E for just call Fubara and Wike. E don reverse plenty democratic and legal decisions before, e even bring back one impeached speaker for Lagos without declaring state of emergency. So why Rivers? Naija politics no too clear.”
“Na dis kind tin dey make us agree with wetin dat corps member talk. Di government no good at all.”
“No be surprise, na wetin we expect from dis regime. How person go suspend democratically elected governor? Since dem dey declare state of emergency for Nigeria, which time dem ever suspend governor? If security problem dey, no be di president suppose restore peace? How removing di governor go bring peace? E pain me say dis kind tin fit still happen for 2025 inside democracy. We dey wait make di Senate correct dis mistake wey di president do.”
