American actor Val Kilmer, wey first blow for film “Top Gun” and later act as Batman and Jim Morrison, don die at age 65, according to wetin New York Times report on Tuesday.
Him daughter, Mercedes Kilmer, tell di Times say na pneumonia cause him death. She talk say dem diagnose am wit throat cancer for 2014 but later e recover.
Kilmer wey start as stage actor first enter big screen for di Cold War spoof film “Top Secret!” wey comot for 1984.
Two years later, e come become famous as di proud but quiet pilot wey dem call Iceman for “Top Gun”, wey be rival to Tom Cruise character, Maverick.
As person wey sabi act different roles, Kilmer later land lead roles for Oliver Stone film “The Doors” and even wear di Batman mask for “Batman Forever”, wey e play Bruce Wayne afta Michael Keaton but before George Clooney.
Kilmer na di youngest person wey dem ever accept for di popular Juilliard school for New York, and e bin wan dey do serious films. But e later land inside plenty big-budget films wey no too make sense and flop for early 2000s.
Afta plenty years of small-small movies, e bin dey plan comeback for di 2010s wit successful stage show about Mark Twain, wey e wan turn into film, before cancer hold am.
Di documentary “Val”, wey show di up and down wey e face for Hollywood, plus as e dey struggle to breathe, first show for Cannes film festival for 2021.
Recently, for 2021, Kilmer still waka enter cinema again wit small role as Iceman for “Top Gun: Maverick”, di sequel to di 1986 hit film.
