One Hollywood writer-director don enter serious wahala as dem arrest am on Tuesday sake of say e chop $11 million wey Netflix give am for one sci-fi series wey dem never show. Instead of to use di money do di film, dem say e use am for crypto investment and big big spending, including buy Rolls-Royces and Ferrari.
Di persin wey dem arrest na Carl Erik Rinsch, wey direct di film 47 Ronin. Federal prosecutors talk say dem charge am for wire fraud and money laundering afta e use one style take collect di money from Netflix.
Prosecutors yan say Netflix first pay Rinsch about $44 million for di unfinished sci-fi series White Horse. But later e con ask for extra $11 million, talk say na di money wey remain to complete di production.
But instead of to use di money finish di show, Rinsch allegedly move di money go hin personal brokerage account, con use am do investment wey fail, wey make am lose nearly half di money in just two months. Prosecutors yan say afta di investment fail, e con transfer di money wey remain enter cryptocurrency, con later cash out di profit put for hin personal account.
Dem say afta di cash out, Rinsch go spend money anyhow. About $10 million e use do flexing, including $1.8 million wey e use clear credit card bills, $1 million for legal fees wey e use sue Netflix for more money, $3.8 million for furniture and antiques, $2.4 million take buy five Rolls-Royces and one Ferrari, plus $652,000 wey e use buy correct watches and designer clothes.
Di first court hearing for di 47-year-old Rinsch happen on Tuesday for West Hollywood, California.
For di courtroom wey dey Los Angeles, Rinsch wear turtleneck sweater and jeans, plus chain for hin hand and leg. E no plead guilty or talk anything extra, na only to answer di judge questions. When dem ask if e don read di indictment, e talk say e never read everything but e sabi wetin dem charge am for.
Di U.S. Magistrate Judge, Pedro V. Castillo, later talk say dem fit release Rinsch dat same day if e fit post $100,000 bond, wey go guarantee say e go appear for New York court, where dem file di case.
Hin new lawyer, Annie Carney, no gree talk outside di courtroom. But for di hearing, she talk say she never check di evidence wey prosecutors bring come. She still talk say di case na purely financial matter.
For now, dem never fix di court date for New York.
