Governor Chukwuma Soludo throw challenge give opposition parties for Anambra State on Monday, say e no see any better person wey fit challenge am as e dey find re-election for November 8, 2025 governorship election.
Di former Central Bank of Nigeria (CBN) governor talk say Ndi Anambra (di people for di state) don agree say im party, All Progressives Grand Alliance (APGA), don deliver better governance and dem suppose give am another chance for di next election.
Soludo, wey dey do media chat to mark im third year for office, talk say di people for South-East fit vote any party for national elections, but when e reach governorship and local government chairman seats, dem dey always stand with APGA.
E talk say, “If election go happen – and e go happen – and if I be candidate, my name go dey for di ballot. I go ask: who else dey run? Which party don bring out candidate?
“As e be so, unless di person go drop from somewhere, but so far, I never hear of any.”
Di former bank oga talk say people don dey call am make e run for second term, but na im party go decide who go be di candidate.
“Na di party go gree and give me di platform. For me, I apply for dis work with clear mind because I feel say na my way to take thank God for all im blessings, use di rest of my life take serve, and leave dis place better dan we meet am.
“If my party nominate me and my employers – wey be di Anambra people wey I apply give for dis work – interview me and gree renew di tenure, e go be great honour and great privilege to serve,” e talk.
Anambra na one of di eight states wey dey do governorship election for different time because of court cases and judgments. Di other states na Bayelsa, Edo, Ekiti, Imo, Kogi, Osun and Ondo.
