Senator Natasha Akpoti-Uduaghan don hail INEC for rejecting di petition wey wan remove am as Kogi Central Senator for National Assembly.
Di senator yarn dis one on Thursday wen she appear for Channels TV Politics Today. She talk say INEC suppose don throway di petition tey-tey before dem even look am on April 3, 2025.
She talk:
“I be lawyer, I be senator and I sabi how Nigeria dey run. For me, di most important thing be say dem don stall di recall process.
I give kudos to INEC even though I believe say dem suppose don throway di matter from day one.
I feel say e no get base at all, because Electoral Act no talk say petition go just spoil if address no dey, but wetin if di address wey dem write sef na fake?”
She come talk say most of di address wey dem put inside di recall petition na fake because many houses for her district no even get number or proper label.
“Even though INEC count 208,000 signatures, I sure say if dem reach verification stage, dem for no fit even see 500 people wey go talk say na dem sign am,” she add.
Natasha still accuse Senate President Godswill Akpabio, Governor Usman Ododo and former governor Yahaya Bello say na dem dey behind di recall wey no work.
For INEC side, dem don finally talk say di petition no meet di requirements wey dey for Section 69(a) of Nigeria 1999 Constitution (as amended), and because of that, “no further action go dey taken on top di recall of di Senator.”
