Justice Obiora Egwuatu don remove imself from di case wey Senator Natasha Akpoti-Uduaghan, wey dey represent Kogi Central District, carry go Federal High Court for Abuja.
For di court sitting on Tuesday, Justice Egwuatu tok say e no go do di case again because Senate President, Godswill Akpabio, wey be di third defendant, accuse am say e no go fit judge di matter fairly.
E be like say Akpabio no get confidence for di court to do justice, na im make Justice Egwuatu decide to step aside.
Di judge don talk say e go return di case file to di Chief Judge of di Federal High Court, Justice John Tsoho, make dem give anoda judge di matter.
Before di judge comot for di case, e don first grant order wey stop di Senate Committee on Ethics, Privileges and Public Petitions from disciplining Akpoti-Uduaghan.
Di senator bin carry di matter go court make dem stop di Senate and di committee from investigating her.
Di female senator and Akpabio bin get wahala over seat arrangement for Senate. She accuse am of sexual harassment and abuse of office. Later, di Senate suspend her for six months for misconduct.
READ ALSO: Natasha People For Her Constituency Don Submit Petition To INEC To Recall Her
