Charity Ijese, wey submit the petition on behalf of the constituents, give am to INEC Secretary, Rose Anthony, for INEC headquarters on Monday, March 24, 2025.
The petition carry title: ‘Constituents’ Petition for the Recall of Senator Natasha Akpoti-Uduaghan on Grounds of Loss of Confidence.’
The people wey sign the petition talk say dem dey use Section 69 of the 1999 Constitution of Nigeria (as amended) plus INEC Regulations and Guidelines for Recall Petitions take pursue the matter.
Dem talk say na Appeal Court decision for October 2023 bring Akpoti-Uduaghan enter Senate, but dem no get confidence for her representation again.
“This petition dey based on say we don lose confidence for the Senator sake of gross misconduct, abuse of office, evasion of due process, and pattern of deceitful behaviour wey don disgrace Kogi Central people and even spoil the name of Nigerian Senate and our democratic institutions.
“We don make sure say more than half of the registered voters for Kogi Central sign this petition, and we dey demand make INEC start the constitutional and procedural process to remove Senator Natasha Akpoti-Uduaghan from office and declare her seat vacant,” dem talk.
Akpoti-Uduaghan bin get issue with Senate President Godswill Akpabio on top seat arrangement matter. She accuse Akpabio say e sexually harass her and abuse im office. After the matter, Senate suspend her for six months for misconduct.
Natasha People For Her Constituency Don Submit Petition To INEC To Recall Her
