Di Independent National Electoral Commission (INEC) don confirm say dem don receive di contact address, telephone number, and e-mail of di people wey submit petition to recall Senator wey dey represent Kogi Central, Natasha Akpoti-Uduaghan.
On Tuesday, INEC bin talk say dem receive di petition but e no meet di “requirements” for recall. Di commission explain say di petitioners no put dia contact details for di covering letter wey dem take submit di petition, as e dey for Clause 1 (f) of dia Regulations and Guidelines.
But for update wey dem give on Wednesday, INEC National Commissioner and Chairman, Information & Voter Education Committee, Sam Olumekun, talk say di missing details don dey available for letter wey dem address to di Chairman of di Commission on Wednesday, 26th March 2025.
“As e dey for Clause 2(a) of di Commission Regulations and Guidelines for Recall 2024, INEC don send letter to notify di Senator wey dem wan recall say dem don receive di petition. Di same letter don reach di Senate presiding officer and e still dey for di Commission website,” di statement talk.
Di next step now na to check di list of signatories wey petitioners submit to make sure say e pass 50% of di registered voters for di constituency. Olumekun talk say dis process go happen for di coming days, and dem go publish di result wey go determine wetin go happen next.
INEC still assure Nigerians say di process go dey open and transparent.
READ ALSO: Petition To Remove Senator Natasha No Meet Requirement — INEC
