Nigerian striker Victor Osimhen don pass legendary Segun Odegbami for Nigeria all-time goal scorers list afta e score hin 24th goal for di country during di important 2026 World Cup qualifier against Rwanda on Friday.
Di Galatasaray striker use correct touch finish Ademola Lookman lofted free-kick for far post, wey give Nigeria di lead for di match.
With dis goal, Osimhen don climb go second position for Nigeria goal chart, and now e dey chase late Rashidi Yekini wey get 37 goals.
Osimhen wey just start hin 2026 World Cup qualifying journey don score 24 goals inside 39 matches for Nigeria.
Last November, e don already equal Odegbami record when Nigeria play 1-1 draw against Benin Republic for 2025 AFCON qualifier.
Dis season, di 26-year-old dey on fire, as e don score 20 goals plus four assists inside 20 Super Lig matches for table toppers Galatasaray.
Across all competitions, e don get 26 goals and five assists inside 30 games.
