Portable don come out apologize to Fuji legend, King Saheed Osupa after e call am “big for nothing” for social media.
Di wahala start when Osupa and e distribution team comot Portable song from streaming platforms like Apple Music and Spotify because dem say e use Osupa lyrics without permission. As dem take down di song, Portable vex go rant online.
But after fans drag am say e no get respect, Portable don reason di matter and now e don beg for forgiveness. For one video wey e post for Instagram, e admit say e temper too hot and e go too far.
E talk say: “My fans, I sabi say my temper dey hot, but di matter don end. Make una forgive me. King Saheed Osupa, Oba Orin, abeg no vex.”
E still talk say na money cause di fight: “Money dey cause wahala. Money fit scatter brothers, papa and pikin. Na music money cause dis one. As I go collect my money, na im dem tell me say dem don comot my song from streaming platforms.”
Portable come finally beg Osupa say make e forgive am: “My daddy, abeg forgive me. Accept me as your pikin.”
Di apology don cause plenty reactions online, as some people dey happy say e don realize e mistake, while others dey talk say make e try dey respect elders for industry.
