Di National Security Adviser (NSA), Nuhu Ribadu, waka go Benue State on Tuesday to show say federal government dey feel di pain wey di people dey pass through after fresh wahala wey don kill over 70 people.
As e dey talk for meeting with stakeholders for Makurdi, Ribadu tell Governor Hyacinth Alia and di people of Benue say make dem no fear — federal government no go leave dem for this kind hard time.
Na President Bola Tinubu send am come, after di “Black Friday” killings wey happen for Katsina-Ala, Ukum, and Logo Local Government Areas.
Wetin happen na serious wahala — na evil act,” Ribadu talk. “But when evil show face, na good people suppose gather body join hand fight am. We go solve this matter together. Make una no feel say una dey alone — this palava concern all of us.”
Di NSA talk say Benue na big part of Nigeria and federal government no go turn back on dem.
“Di whole country dey with una. I come to tell una say this time hard for everybody. But we dey with una 100%. We go face this matter together,” e add.
Ribadu talk say di government of President Tinubu meet Nigeria security system wey don scatter wella, but say dem don begin fix am small small.
“We meet country wey wahala too much, but even though di fight never finish, di killings don reduce since we enter office. Na gradual process, and we dey tackle am well,” Ribadu yarn.
E come beg everybody make dem no turn di killings to political matter.
“Make una give us chance and no dey play politics with this kain thing. No be every corner we fit put soldier or police, but our security people dey try. We must join body to bring back peace,” na wetin Ribadu talk be that.
E still mention say di insecurity wey dey Nigeria no start today — e don dey since 2011.
“This one no be about religion, tribe or politics — na pure criminal act. Plenty countries like Sudan, Niger, Mali and Burkina Faso dey face worse thing pass this one,” e talk.
Ribadu talk about how e work before for Afghanistan to show say security wahala no be new thing worldwide. E come praise di way President Tinubu dey handle di mata now — say di government dey listen and dey act fast.
“Di way we dey tackle insecurity now different. We dey find di real cause of di problem and we dey handle am straight. We don see progress, and we go continue to dey improve,” e talk last last.
