Rivers State Govnor, Siminalayi Fubara, don invite di Speaker of di State House of Assembly, Martin Amaewhule, and oda lawmakers for meeting.
Di meeting go shele for di Govnor office inside Government House, Port Harcourt, on Monday.
Dis one dey inside one letter wey dem write on March 7, and people see di letter on Sunday.
Di Secretary to di State Govment, Tammy Danagogo, sign di letter.
“I dey write dis letter as follow-up to wetin His Excellency promise for my letter wey I write on di 5th of March, 2025, to inform you say His Excellency don receive di Supreme Court judgment, and e don direct me make I invite you and your colleagues – di Honourable members of di Rivers State House of Assembly – for meeting,” di letter tok.
SSG tok say di meeting between di govnor and di lawmakers go focus on how dem go arrange better place for Assembly sittings, pay all di money wey dem suppose give Honourable members, plus oda allowances wey remain.
Dem go still discuss di presentation of budget and oda important mata wey go help move di oil-rich state go forward.
“As we don talk all dis one, I go like humbly invite di Rt Hon Speaker and all di members of Rivers State House of Assembly for dis meeting with di Govnor:
Date: Monday, March 10, 2025.
Time: 10am
Venue: Govnor Office, Government House, Port Harcourt.
“Tank you well well, Sir, as we dey expect make una show, so we fit discuss di way forward for di betterment of Rivers State people.”
