Samsung Electronics co-CEO, Han Jong-hee, wey dem sabi for di way e take push di South Korean tech giant TV business go global level, don die of heart attack on Tuesday for di age of 63, di company tell AFP.
“Im die from cardiac arrest today,” one Samsung spokesperson tok, as e still add say Han leave im wife and three children behind.
Han join Samsung for 1988 and e play big role to make sure say di company high-end TV sets shine for di world.
“Han dey central for di unveiling of Samsung world-class LED TVs,” di company tok for one biography wey dem publish earlier dis month.
“E numerous innovations help di company show say e dey lead for technology matter,” dem still add.
Samsung recognize Han say na im make di company televisions reach di top for di global market – and e still help dem maintain di position.
Samsung Electronics na di flagship subsidiary of di South Korean giant Samsung group, wey be di biggest of di family-controlled conglomerates wey dey run Asia fourth-largest economy.
Han no be member of di Samsung family, wey still dey control di company, with third-generation leader Lee Jae-yong as di current chief of Samsung Electronics.
Han death happen as di world biggest memory chip maker dey face business wahala for e race to produce chips wey AI dey use.
Di company don dey struggle to meet Nvidia requirements, as rival SK Hynix don become di main supplier of high-bandwidth memory (HBM) chips wey Nvidia dey use for e AI graphics processing units.
Di tough market condition make chairman Lee Jae-yong talk say di company must get “do-or-die” mindset to fit face di challenges wey AI don bring, according to wetin media reports talk last week.
Samsung don admit since October say dem dey inside “crisis”, as e confess say people don dey question di company “fundamental technological competitiveness and di future of di company.”
