Di Senator wey dey represent Kogi Central, Natasha Akpoti-Uduaghan, don accuse Senate President, Godswill Akpabio, say e sexually harass am.
But Akpabio don deny di allegation through im media consultant, Kenny Okulogbo.
Akpoti-Uduaghan make di allegation during one interview wey she do with Arise Television on Friday.
She talk say Akpabio block her motions from being heard for Senate because she no gree for im advances.
Di Kogi lawmaker add say because she reject Akpabio sexual advances, e come dey harass her steady and dey spoil her name for him house for Uyo, di Akwa Ibom state capital, and for him office.
She talk say, “Di problem wey I get with Akpabio start on December 8, 2023. We go him house for Ikot-Ekpene, and as we reach, e hold my hand say e wan show me around di house. Na just di three of us, me, my husband, and am. I notice say e fast-track im movement while e still dey hold my hand, and as e reach one sitting room, e ask me, ‘You like my house?’ I reply am say, ‘Of course, yes,’ and e come tell me say, ‘Now wey you be Senator, you go create time make we spend quality time here, and you go enjoy am.’
She continue say, “Later for Senate chamber, some Senators tell me make I go meet am so I fit move motion for Ajaokuta Steel matter. But as I reach am, e tell me say, ‘Natasha, I be di Chief Presiding Officer of di Senate. You fit enjoy plenty things if you take care of me and make me happy.’ Na dat point I tell am say I go pretend say I no hear wetin e talk.
“My own case be like say na student wey dem dey punish because she no gree sleep with lecturer.”
But as Okulogbo, di media consultant to Akpabio, respond, e talk say di allegations na “tissues of lies.”
Okulogbo talk say Senator Natasha just dey vex because dem remove am as di Chairman of di Senate Committee on Local Content.
E talk say, “Everything wey Senator Natasha talk na lie. She just dey vex say dem comot am as di Chairman of di Senate Committee on Local Content.
“Di Senate President go respond. We go release official statement soon.”
