Di complaint wey Senator Natasha Akpoti-Uduaghan carry go United Nations Inter-Parliamentary conference for New York on Tuesday still dey bring reactions.
Di Kogi lawmaker don go before di global institution make dem help am fight wetin she call injustice wey dem do her.
After dem hear her matter, di IPU tell Senator Natasha say dem go take necessary steps to address her complaint after dem hear from di oda side too.
But di Nigerian Senate don reply Senator Natasha complaint to di IPU through letter wey Senate Leader, Senator Opeyemi Bamidele write.
Di letter wey Honourable Kafilat Ogbara, Chairperson of House of Representatives Committee on Women Affairs and Social Development read for di event, talk say:
“Senator Natasha Akpoti-Uduaghan dey suspended because of gross misconduct and unruly behaviour, no be because of any sexual harassment or assault allegation. Di Senate of di Federal Republic of Nigeria strongly reject di misinformation and false narrative wey some media organisations dey spread about di six-month suspension of Senator Natasha Akpoti-Uduaghan.
Make e clear say Uduaghan suspension na because of her continuous misconduct and disregard for Senate Standing Orders.”
Honourable Ogbara still talk say make dem properly investigate di allegation wey Senator Natasha carry give Senate President Godswill Akpabio.
She insist say di Senate follow all procedures before dem suspend Natasha.
Last week, di Senate suspend di lawmaker, wey don cause plenty talk for di country.
She first submit petition against Akpabio for sexual harassment, but di lawmakers reject am before dem suspend her, even after she submit another petition.
Senator Natasha don swear say she go continue di fight against “injustice.” But Akpabio don deny di allegations, talk say he never harass any woman before.
Dem wahala start for February 20, 2025, after dem change her seat for plenary.
No be today di two of dem dey get issue. For July 2024, Akpabio don already correct am for misconduct, tell her make she follow Senate rules, say Senate no be nightclub wey anybody fit talk anyhow. Later, di Akwa Ibom Senator apologise to her for di statement.
