No be as some people dey talk am, Supreme Court no rule who be correct Speaker for Rivers State House of Assembly for di case wey Governor Siminalayi Fubara carry go court against di Martin Amaewhule-led Assembly.
Human rights lawyer, Femi Falana, SAN, clear di matter for interview wey e do on Monday after di Supreme Court dismiss di governor appeal.
Falana talk say, “If court dismiss appeal no be because dem check di matter well, but because di person wey carry di case comot am, e no mean say anybody suppose celebrate. For dis case, di Rivers State Governor tell e lawyers make dem withdraw di appeal because e don turn to academic exercise.”
E still talk say di court no talk who be di real Speaker. Di case wey dem carry go court dey connected to di 2024 budget wey di governor talk say dem don already pass, so e no make sense to continue di case.
Na Justice Uwani Abba-Aji lead di five-man panel of di Supreme Court wey dismiss di appeal against Amaewhule-led group after Fubara lawyer, Yusuf Ali, withdraw am.
Di Rivers Assembly don dey get wahala since 2023 as 25 lawmakers wey dey follow former Governor Nyesom Wike waka, move from PDP enter APC. Since den, di House leadership don cause gbege between Amaewhule side and Victor Oko-Jumbo group wey dey support Fubara.
Fubara don dey do government work with Oko-Jumbo group, e no dey recognize Amaewhule side.
Falana talk say three lawmakers fit run di House of Assembly work, except if e concern di governor impeachment. E still insist say di 27 lawmakers wey waka comot from PDP enter APC no suppose dey for House again because dem seats don vacant.
