Wahala bust for Ilorin, wey be di capital of Kwara State, after heavy rainstorm wey last for just 30 minutes on Monday cause kasala.
One Taekwondo coach and champion wey dem identify as Musa Ismail, wey come from Ilorin, don kpai for rainstorm wey happen for Lower Niger River Basin Authority area.
Di rainstorm scatter di whole Badminton court, wey dem just renovate under di former administration. According to people wey see wetin happen, one part of di building collapse come fall on top di coach.
Dem talk say Ismail na young and friendly coach wey dey train people for Badminton and e just win di 2025 MKA Taekwondo Championship wey dem do for Ede, Osun State.
E don marry for more than one year and e get one pikin wey e leave behind.
From wetin our reporter gather, Ismail dey play and train with im friends for di facility before di rainstorm happen. By Tuesday, people see say di court don seal am off, but di broken part still show from outside.
When dem try talk to workers for di place, dem no gree talk anything. Efforts to reach oga for di agency no work as at di time wey we dey do this report.
One staff wey no wan make dem mention im name talk say, “Na true, di thing happen on Monday during di rain, but na only di Managing Director fit talk anything and e no dey office now. If you come tomorrow, you fit see am.”
