President Donald Trump of di United States don talk say e go put 25% tariff on imported cars plus tax wey go affect semiconductors and medicine wey dem bring enter di country.
Reports talk say dis move na one of di many wey fit scatter global trade.
Trump yarn on Friday say di new tax go start as early as April 2, just di day after e cabinet members go present am reports wey go show different options for import duties.
Di US president don always para say foreign countries no dey treat US automotive exports well. For example, di European Union (EU) dey collect 10% tariff on car imports, wey be four times di 2.5% wey US dey collect for passenger cars. But US dey collect 25% tariff on pickup trucks wey no come from Mexico or Canada, wey dey make Detroit automakers enjoy better profit.
Meanwhile, European Union trade chief, Maros Sefcovic, go meet US officials for Washington on Wednesday to discuss di wahala wey Trump wan cause with di new tariffs.
When dem ask Trump whether EU fit escape di new tax, e talk say di EU don already show say dem fit reduce di tariff on US cars to match US rate, but EU parliament members don deny say dem make dat kind agreement.
Trump still promise say e go put pressure on EU leaders make dem buy more US cars and other products.
