All Progressives Congress Presidential Campaign Council don release one 422-man list as members for the council wey get the responsibility to make sure the party presidential candidate, Bola Tinubu win the 2023 election.
The list wey include former ministers, governors, plus other ogbonge people no include Vice Presido Yemi Osinbajo, former Secretary for the Government of the Federation, Babachir Lawal; former Speaker of the House of Representatives, Yakubu Dogara; former Minister of State for Education, Chukwuemeka Nwajiuba plus other people.
Former Rivers State Governor, Rotimi Amaechi plus Minister of Interior, Rauf Aregbesola names de the list.
For the list wey the council Secretary James Faleke release for Friday night, Plateau State Governor, Simon Lalong, maintain him position as Director-General even Adams Oshiomhole maintain him position as Deputy Director-General on top operations, Bayo Onanuga come still maintain him position as the Director on top Media and Publicity.
Faleke still announce say President Muhammadu Buhari na the chairman for the council while Tinubu go serve deputy chairman plus including APC national chairmo, Abdullahi Adamu.